Leave a comment

မြေပုံနဲ့ ပုဏ္ဏားကျွန်း ရွာ နှစ်ရွာက လူငယ်တွေနဲ့ လူလတ်ပိုင်းတွေကို တပ်မတော်ဖမ်းဆီး

 

ရခိုင်ပြည်နယ် မြေပုံနဲ့ ပုဏ္ဏားကျွန်းမြို့နယ်တွင်း ရွာ နှစ်ရွာက လူငယ်နဲ့ လူလတ်ပိုင်းအရွယ် အမျိုးသားတွေကို တပ်မတော်က ဖမ်းဆီးသွားတယ်လို့ ဒေသခံတွေ ပြောပါတယ်။ ဒါကြောင့် ဒေသခံတွေဟာ ရွာမှာမနေရဲဘဲ နီးစပ်ရာရွာတွေကို ထွက်ပြေးနေကြတယ်လို့ ဆိုပါတယ်။

မေလ ၉ ရက် ဒီမနက် ၄ နာရီလောက်မှာ မြေပုံမြို့နယ် ရေရှင်ရွာကို တပ်မတော်စစ်ကြောင်း ဝင်ရောက်လာပြီး မနက် ၆ နာရီလောက်မှာ ကျေးရွာသား ၇၀ လောက်ကို ဖမ်းဆီးသွားတယ်လို့ ဒေသခံတွေက ပြောပါတယ်။ အသက် ၁၂ နှစ်အထက် လူငယ်တွေကို ဖမ်းဆီးပြီး ရေရှင်တောင်ပေါ်ကို တပ်ရိက္ခာသယ်ခိုင်းတာလို့ လုံခြုံရေးအရ အမည်မဖော်လိုတဲ့ ရှေရှင်ကျေးရွာက ဒေသခံတစ်ဦးက RFA ကိုပြောပါတယ်။

“တပ်မတော်စစ်ကြောင်းက မနက် ၄နာရီကဝင်တယ် မနက် ၆ နာရီမှာ တစ်အိမ်တက်ဆင်းမွှေပြီး လူတွေကိုဖမ်းမယ် အသက်လေးဆယ်ဝန်းကျင်ဆို မဖမ်းဘူး ၂၀ အထက် ၁၂ နှစ်အထက်တွေ ဖမ်းတာ ၂၀ ပတ်ဝန်းကျင်ကလေးတွေကို ဖမ်းရိုက်တယ် သေနတ်ဒင်နဲ့ထုတယ်။ ပြီးတော့ တောင်ပေါ်ကို ပစ္စည်းထမ်းခိုင်းတယ် မထမ်းနိုင်တဲ့သူတွေကို ရိုက်တယ်။ အစာလည်းမကျွေး ရေလည်းမပေးဘူး။ လူ အယောက် ၇၀ လောက်ရှိတယ်။ ရေရှင်ရွာနားကတောင်ပေါ်ထမ်းခိုင်းတာ ။ စစ်တပ်ရိက္ခာပေါ့။”

အခု နောက်ဆုံးရရှိတဲ့ သတင်းတွေအရ ဖမ်းဆီးသွားတဲ့ ရွာသားတွေထဲက အများစုကို ပြန်လွှတ်ပေးလိုက်ပြီး၊ နှစ်ဦးကိုတော့ ဆက်လက်ဖမ်းဆီးထားတယ်လို့ ဒေသခံတွေက ပြောပါတယ်။ ဒီအခြေအနေကြောင့် တချို့လည်း ရွာမှာ မနေရဲဘဲ နီးစပ်ရာရွာတွေကို ထွက်ပြေးနေကြပြီး၊ အမျိုးသမီးတွေနဲ့ သက်ကြီးရွယ်အိုတွေပဲ အများစု ကျန်ခဲ့တယ်လို့ ဒေသခံတွေက ပြောပါတယ်။

ကျေးရွာအဝင်မှာ လက်နက်ကြီး နှစ်ခု ရွာအလယ်မှာ လက်နက်ကြီး တစ်ခုနဲ့ ရေရှင်တောင်ပေါ်မှာ လက်နက်ကြီး တစ်ခု စုစုပေါင်း လက်နက်ကြီး လေးခု တပ်စွဲထားတယ်လို့ ဆိုပါတယ်။

အလားတူ ပုဏ္ဏားကျွန်းမြို့နယ် ဒိုးတန်းရွာဟောင်းက ဒေသခံ ခုနှစ်ဦးကိုလည်း ဒီနေ့မနက်ပိုင်းမှာပဲ တပ်မတော်က ဖမ်းဆီးသွားတယ်လို့ ဒေသခံတွေက ပြောပါတယ်။  အသက် ၅၀ ဝန်းကျင်းအရွယ်တွေကို ဖမ်းဆီးသွားတယ်လို့ သိရကြောင်း ပုဏ္ဍားကျွန်းမြို့နယ် အမျိုးသားလွှတ်တော် ကိုယ်စားလှယ် ဦးခင်မောင်လတ်က ပြောပါတယ်။

“ကိုးနာရီဝန်းကျင်မှာ ထွက်သွားတယ် အသက် ငါးဆယ်ဝန်းကျင် ရွာသား ခုနှစ်ဦးလောက် ခေါ်သွားတယ် ကျေးရွာကလူတွေက ထွက်ပြေးနေကြတယ် မိသားစုတွေကတော့ စိုးရိမ်နေကြတယ်။ ကျေးရွာအုပ်ချုပ်ရေးမှူး ကတော့ ပါမသွားဘူး။”

ပြီးခဲ့တဲ့ မေလ ၇ ရက်နေ့ကလည်း ဒိုးတန်းရွာသစ်ကို တပ်မတော်စစ်ကြောင်း ဝင်ရောက်လာပြီး ဒေသခံ ၁၂ ဦးကို ဖမ်းဆီးကာ မေလ ၈ ရက်နေ့ ည ၉ နာရီလောက်မှာ ပြန်လွှတ်ပေးခဲ့တယ်လို့ အမည်မဖော်လိုတဲ့ ဒေသခံတစ်ဦးက ပြောပါတယ်။

“ရွာသစ်က လူ ၁၂ ယောက်ခေါ်သွားတာ ၈ ရက်နေ့ ည ၉ နာရီလောက်မှာ ပြန်လွှတ်ပေးလိုက်တယ်၊၊”

ကျေးရွာသားတွေကို ဘာကြောင့် ဖမ်းဆီးတယ်ဆိုတာ မသိရကြောင်းနဲ့ အဲဒီကျေးရွာတွေမှာ အရင်က တိုက်ပွဲ ဖြစ်ပွားတာမျိုး မရှိဘူးလို့ ဆိုကြပါတယ်။

အဲဒီကိစ္စတွေနဲ့ ပတ်သက်ပြီး အနောက်ပိုင်းတိုင်း စစ်ဌာနချုပ် တိုင်းဦးစီး ဗိုလ်မှူးကြီး ဝင်းဇော်ဦး ကို RFA က ဆက်သွယ်မေးမြန်းပေမယ့် မရခဲ့ပါဘူး။ တပ်မတော် သတင်းမှန် ပြန်ကြားရေးအဖွဲ့က ဗိုလ်မှူးချုပ် ဇော်မင်းထွန်း ကတော့ ဒီသတင်းကို မသိရသေးကြောင်း တုံ့ပြန်ခဲ့ပါတယ်။

ရခိုင်ပြည်နယ်မြောက်ပိုင်းက တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ ဒုက္ခသည် အရေအတွက်ဟာ တစ်သိန်းခုနှစ်သောင်း လောက်ရှိနေပြီလို့ ရခိုင်တိုင်းရင်းသား မျိုးနွယ်စုများအစည်းအရုံး REC က ကောက်ယူ ထားတဲ့ စာရင်းတွေအရ သိရပါတယ်။

RFA က ရရှိတဲ့ အချက်အလက်တွေအရ ရခိုင်ပြည်နယ်မြောက်ပိုင်းနဲ့ ချင်းပြည်နယ် ပလက်ဝမြို့နယ်တွေမှာ ပြီးခဲ့တဲ့ ဖေဖော်ဝါရီ ၂၆ ရက်နေ့ကနေ ဧပြီလ ၂၀ ရက်နေ့ တစ်လကျော်ကာလအတွင်း သေဆုံးတဲ့ အရပ်သား ၈၅ ဦးထက် မနည်းရှိနေပြီး ထိခိုက်ဒဏ်ရာ ရရှိသူဟာလည်း ၂၀၀ ကျော်အထိ ရှိနေပါတယ်။

 

https://www.rfa.org/burmese/news/army-arrested-myaypon-ponnagyun-young-adults-villagers-05092020072757.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: